MAI te Yangon-Singapore-Jakarta lengtading

ZomiDaily :: Myanmar Airways International (MAI) vanlengte tukum June kha akipan Yangon pan Singapore leh Jakarta (Indonesia) gamte ah Direct in lengsuak theitading ci'n MAI Marketing Manager in zanni-in genkhia hi. Nidangin Kawlgam pan Indonesia gam apainuam khualzinte in Malaysia ahih keileh Singapore ah baangphot in, tuapan Transit hamtang kul hi. Hih MAI te'n Passenger tutna 162 apha Airbus A-320 vanlengte nisimin Yangon-Singapore-Jakarta lengsakding ci ahih manin, khualzinmi tampi adingin noptuam mahmahding hi.

Hih Jakarta vanleng banah MAI te'n Yangon leh Dubai zong Airbus A-320 temah zangin Direct Flight alentheih nading vaihawmna aneihlaitak cihi. Tuaban ah South Korea, Japan, Qatar, United Arab Emirates (UAE) gamtezong Kawlgam panin Direct Flight lentheih nading Project omkhin cih kiza hi.

Tulaitak MAI te'n gamdang International Flight alengthei Airbus A-320 vanleng 4 nei uh a, Asia gam 6 sungah lengsak uhhi. MAI te lenna tua gamte pen Cambodia, China, India, Malaysia, Singapore, Thailand cihte hi a, Yangon panin Kuala Lumpur, Singapore, Bangkok, Guangzhou, Gaya, Siem Reap, Yangon-Bangkok-Singapore cih bangin lengsak uhhi.

MAI pen August 1993 kumin Kawlgam kumpi neihsa ahi Myanma Airways leh Singapore aom Highsonic Enterprises te kipawlkhawm in, Royal Brunei Airlines te'n ongpanpihciang ongpiangkhia Internatioanl Flight khat ahihi.

Kawlgam neihsa vanleng ahi MAI banah adang gamdangte neihsa vanleng Airlines 13 zong Yangon dong onglengsuak theihi. Tua te in Air China, China Southern Airline, China Eastern Airlines, Thai Airways International, Indian Airlines, Air Asia Barhad’s, China Airlines, Silk Air, Malaysian Airlines, Bangkok Airways, Jetstar Asia, Thai Air Asia, Vietnam Airlines cihteng ahihi.