Kawlgam galkapte Bu 7 si

Last Updated on Sunday, 15 May 2011 08:19 Written by Admin Saturday, 14 May 2011 21:27

Shan State leitaw lam a om Phekhong Tsp., pansan Sah Kah Kha-7 khutnuai  Kha Lah Yah (422) galphual pan galkap 30 te' tuanna mawtaw pen Maikai Tsp., Tunglaw-Sadaw khuaneu a nawk laitak in, SSA galkapte in May 9,2011 ni-in pang simin nasiatak kikap uh a, Kawlgam galkap Ulian khta le adang 9 sipah in 15 liam uh hi. SSA-S pan thupuakna ah asite lakah galphuan kempa Col. Than Wai si ci uh a, Zato lam pan akizak kikna ah Lt. Col. Thein Win ci-in kigen leuleu hi. Hih kikapna tawh kisai in Nipyidaw lam panin bang mah pulak nuam lo uh cih kiza hi.

Kawlgam galkap aliam 15 te pen Maikai zato ah kipuak ci in Shan galkapte khatin gen hi. SSA-S galkap pa genna ah, " Kawlgam galkapte' mawtaw apai pen ka mu masa uh a, limtak mun la pahin ka buk pah uh " ci-in gen hi. Tua banah  "amau lam pan Thauvui thautang kicingtakin nei uh"  cih zong gen lai hi. Thakhat thu a kikap (Ambuse) ahih manin, a mau lam pan ahonpi khat asih ding mah hi ci-in gen hi. President U Thein Sein kumpi asep kipan akipan SSA-S le Kawl galkapte 10 vei val kikap khin uh hi.
 

UN Palai le Daw Aung San Suh Kyi kimu

UN Secretary-General thudotpi le Kawlgam palai (Special Envoy) ahi India gammi Mr.Vijay Nambiar pen May 12,2011 ni-in Kawlgam zinin, tua ni mahin Daw Aung San Suh Kyi (NLD tawh nitak lam (6:00PM) hunin kimuhna nei thei hi. Tua banah Kawlgam kumpithak Minister te tawh Nipyidaw ah kimuhna nei-in, gamvai a thongkiate khahkhiatna ding a genpihnate kumpi uliante in bang mah dawnna nei lo cih kiza hi.

Mr. Vijay Nambiar in Kawlgam ah nithum a tam sungin President U Thein Sein om lo ahih manin, gamdang lam vaisaipi U Wanah Maung Lwin le Ministrty of Home Affair Minister U Koko tawh May 12,2011 ni-in Nipyidaw ah kimuhna nei uh hi. Tua khitteh May 13,2011 (11:00AM) hunin Kawlgam kiteelpi sungah akihel National Democratic Force (NDF) party le adang party 10 te tawh UNDP zumpi , Yangon ah kimuhna nei thei cih kiza hi. Mr. Vijay Nambiar pen UN Secretary General Mr. Ban Ki Moon zumah abeisa January 1,2007 akipan nasep kipan in,Kawlgam tawh kisai UN palai a thumna zong ahi hi. Source: Tongsan

Daw Aung San Suu Kyi Khualzin khiading

Kawlgam mipite' makaipi Daw Aung San Shu Kyi (NLD) in mai kha sung akipan Yangon khuapi pua lamah mizawn dingin khualzin kipanta ding cih kiza hi. A kikhumcipna pan a suahtak akipan nasep maban tam nei semsem in, NLD zum le a inn kikal bekbek tawh a hun bei den ci hi. Tua manin mipite tawh kimu kawikawi dingin asawt loin mundang ah khualzin ding geelna lianpi nei ta hi.

Tua banah Aung San Shu Kyi a kikhumcip hun sung a Kawlgam galkapte in NLD Party asihsakna thu tawh kisai leitungbup Phungzite kipawlna pan Phungzi khatin dotna pen Aung San Suh Kyi in adawnna ah, " Democrecy  kalsuan zia manpha a sate in khutkilen a mapang kik mahmah ding ci in gen hi. Bangbang a hi zongin Aung San Shu Kyi le mipite kipumkhat a nasepkhop ding mah thupi kisa penpen hi. Source: Tongsan

Mualhoih Gospel Ministry pan Sia Khamno khualzin

ZomiDaily :: Mualhoih Gospel Ministry makai pipa Evan Kham Suan Go pen lungdam nathu gen koikoi dingin May 6-12 sung Singapore ah vapai theihi. Tuapan in Malaysia ah May 12 ni-in paiphei a, May 28 ni ciangin Kawlgam lam zuankik ding hi.

1997 kum a Evan Kham Suan Go ong patkhiat ahi Mualhoih Gospel Ministry khankum sawt tangbang damdingin sian in ongsiam tahen. Crusade le Camp mun tampi ah 8 vei bawl khin uh a, khamthei guihthei zavom, zakang azang Zomi te tampi piangthak sakkhin hi. Khamtheih Camp pan a kikhel mite Laisiangtho sangkah in hunbit Pasian na sem zong omta uhhi.

Mualhoih Gospel Team tepen laphuah leh lasak zong siam mahmah uh a, tu lai tak Mualhoih Vol. 2 zong adeihte in kingahthei laiding hi. Mualhoih Gospel Ministry nasepna vai leh lakhui adeihte in mgmmualhoihkham@gmail.com ah ki contact theiding hi.

Korea President luipa' tuapsungah phim kimu

ZomiDaily :: Korea President lui Roh Tae-woo bukkhuh nasiatak in vei ahihman in zato ki puak a, aki at khitciang a taklam tuapsungah phim 6.5 cm a sau khat mukhia uh ci hi. Tua phim alakkhiat a ki pan dam tuamzo deuh ci hi.

Roh Tae -woo kum 78 in 1988 pan 1993 sung kumpi sem a 2002 ki pan dam loh na ki pan hi. A tuap sungah phim omtawh kisai-in Korea gam a Senzatui lam siam mi 20000 val in, bangci bangin a tuapsungah phim lut theidinghiam cih kankhiatna aneih thei nangin thuneite tung ah thumna nei uhhi. Phim pi khat a vek in tuapsung ah a tum thei nading, training mantak a zo sakhat in hih khial lo ding hi ci uhhi. 

Kap Cin

Hakha ah zukhamsul in mi 1 kithat

ZomiDaily :: Chin State ii Capital ahi Hakha khuapi ah May 09, 2011 ni-in mikhat kithat cih Khonumthung pan kizasawn hi. Tua akithakpa pen Kawl minam Nyi Nyi Htwe (kum 46) cih minneikhat hi a, Magwe Division, Kankaw Towhship sung aom Kan Village pan ahihi. Hakha ah nasep zongdingin May 08 ni-in apaito hi a, azingciang ana kithat hihtuak hi. Asipa pen khuasung ah mi 4 tawh zu dawnkhawmin, akithuahpih 4 tengmah in suamlum cihi. Nyi Nyi Htwe pen zingsang ciangin lampi tungah kimu a, akimuh hunin sinailo in, ahihhang pauzo nawnlo hi. Zato ah kipuakpah a, zato panin laitat hi ci'n Hakha pan amukha khuami khatin genkhia hi.

Athatte lilak ah akihelding in aki ummawh khat ahi Boia pen Hakha pan 20 Miles agamlatna Thantlang khua ah palik te'n man khinzo hi. Adang 3 tengpen India gam, Mizoram State lamah taito uhhi. Hih mithahna vai ah akihelding in aki ummawh adang mi 7 zong Hakha Police Station ah kikem hi.