Osama Bin Laden thah a ni

By Ela Khiangte, Australia
Mihring thisen chhuah pawisa lo, pawl firfiak ni a hriat hlawh, al Qaeda pawl din chhuaktu leh hruaitu lu ber Osma Binladen chu May 2,2011 khan US sipai ten an thah thu Media hrang hrangah a lang uar uar a. Binladen-a thih thu hi U.S. President Obama meuhin nemnghetin officialin a tlangzarh a, he thihna hi “America mipui ten al Qaeda mi firfiakte chunga hnehna ropui tak kan channa ni a ni e” tiin a sawi.

U.S. official in a puan dan chuan Binladen-a hi a  tawm rukna  Pakistan khawpui, Islambad atanga hmar lam mel 31 a khaw awm Abbottabat khuaa a chenna in, chhawng thuma sangah thah a ni. 

 Helicopter pali nen meuh U.S. sipai te chu Binladen-a compound-ah hian an thlawk lut a,  Binladen-a chu rawn in surrender turin an ngen hmasa a. A in-surrender duh tak loh avangin indo chu an tan ta nghal a, minute 40 dawn lai an inkah hnuah Binladen-a chu a mit veilam (a lu)ah  an kap a; a fapa, a nupui leh a mi rin ber ber pahnih pawh an kap hlum bawk. U.S. sipai tumahin hliam an tuar lo va, helicopter pakhat erawh an chan thhung.

U.S. sipai te lukhum-ah chuan camera an dah a, an indo lai video chu White House atangin Obama leh a khawnbawl te chuan Live-in an lo thir a. Binladen-a an kah fuh meuh chuan Obama chuan, "kan hneh ta" tiin a au chhuak nghe nghe ni awm e.

Binladen-a ruang chu helicoper-in an phur chhuak nghal a, Arab tuifinriatah an paih/phum a. Hetia tuifinriata an phum na chhan hi, eng ram mahin Binladen-a ruang hi lak an duh loh bakah nakin hun lo kal leh zel turah Binladin-a hnung zuitu ten an phumna hmun hi hmun thianghlimah ngaia tawngtai tura an pan thin, an punkhawm thin an hlauh vang niin an sawi a. A ruang hi an silfai a, puan var nen uluk takin an tuam a,Islam dan zuiin a thih atanga darkar 24 chhungah an phum/an paih bo ta niin U.S. official chuan an sawi.

Binladen-a thih thu hi President Obama chuan official-in mipui hmaa a tlang zarh hma atang tawh khan White House kawt zawlah Binladen-a thihna lawm turin mipui an tling khawm hmur  a, USA,USA,USA tiin an au thup thup a.

“Vawiin hian U.S sipai mi huaisen filawr tlemte chuan ka tirhna leh thupek angin Binladen-a tawm buk Abbottabat chu an bei a, civil tumah hliam lo tein an tum chu an puitlin a ni”, tiin President Obama chuan ama’ hriatpuia tuntum thil hi hmalak a nih thu a sawi. U.S. sipai te hi tumah hliam tuar an awm lo.

Osma Binladen-a kaihhruai, al Qaeda mi firfiak ten September 11, 2001 ah America insang thlawhna nen an beih tum khan mi 3,000 laiin nunna an chan phah a, kum 10 dawn lai a ral meuh chuan Binladen-a pawn a tuhrah a seng ta a ni ber e.

President Obama chuan, “Islam sakhua hi kan haw lo va, Muslim te pawh kan do hek lo; mahse thisen chhuah pawisa lo al Qaeda pawl hi kan do a ni” tih thu uar taka a sawi ang bawkin, The Council on American-Islamic Relations (CAIR) tia an koh America rama Muslim civil right humhimtu pawl pawhin Osma Binladen-a thihna hi pawi an tih loh thu an tarlang a.

Binladen-a thihna hi American tanah hnehna ropui tak a nih rualin hmalam huna buaina tisosangtu a nih ring pawh an kat nuk bawk.