Ringtu mawhphurhna

By: Upa Evan Vanlalmawia, Zohmun

Miin Lal Isua chu a rin tawh phawt chuan awm mai mai thei a ni tawh lo. Lalpa thu pek zawm a, a tih tur dik tak ti tura phut a ni tawh. Kan Rinna hi kan dam chhunga sawipui, hlawkpui ngei tur a ni a. Khawvel mi ang kan ni satliah mai tawh lo a ni. Lalpa rawng kan bawl a ngai a ni. Paula chuan, "Pathian khawngaihna chu sawtpui lova in hmuh lohna turin amah thawhpuiin ka ngen chiam a che u," ( IIKor. 6 : 1 ) a ti a. A chhan chu " Mitin an thil tih ang zela pek turin ka lawmman ka hnenah a awm," (Thup. 22 : 12 ) tih a ni. Pathianin hun lawmawm min pek chhung hian kan thawkrim tur a ni. Paula chuan, "Intihsiakna tha chu ka bei zo tawh a, ka tlansiakna kawng pawh ka hlen tawh," ( II Tim. 4 : 7 ) a ti a. Keni pawhin Lalpaa kan mawhphurnate chu hlen ngei kan tum tur a ni. Kan chak vang leh kan phur vang ni lovin, Pathianin min phut tlat, kan mawhphurhna chu, "Chanchin Tha kan hril ngei tur a ni" tih hi ( Mtt. 28 : 19 ) a ni.

1. Ringtu dinhmun

 Pathian zarah ringtu dinhmun hi a ropuiin a duhawm em em a ni. Bible-ah hetiangin a sawi a, "Tupawh Kristaa awm chuan thil siam thar a lo ni a," ( II Kor. 5 : 17 ). "Chi che thei lo laka piangthar in ni ( I Pet. 1 : 23 ). " Chung mite chu thisen hrin an ni loa, Pathian hrin an ni ( Johana 1 : 13 ). " Thlaraua piang thar an ni," ( Johana 3 : 6 ). Hetiang mite hi kan nih vangin kan thinlung leh taksa pumpuiah hian Pathian thlarau chuan lalna a chang tlat tur a ni. Miin a dinhmun leh nihna dik tak a hriat loh chuan, a tih tur ti loin a tih loh tur zawk a tih phah fo thin a ni. Tun laia Kristian ten kan tih ve hauh loh tur kan tih fo, mimal nun tichhetu leh hnam nun leh sakhaw nun tibawrhbangtu a awm. Chu chu kan tih loh tur kan tih thin fo hi a ni.

2. Ringtute tih loh tur

a). Zu zawrh:

Zu zawrh hi Pathianin a phal lo a, a khap bur mai a ni. Bible-ah chuan, "A thenawm hnena zu in tur petu chu a chung a puk e, nang, a saruak i hmuh theih nana i tur chawhpawhlh petu chu," ( Habakuka 2 : 15 ) a ti a. Chuvangin zu zawrh hi Pathian anchhedawnna, chungpikna a ni. Anchhia chu mahni mihringpuite damchhung atan leh hremhmun thlenga rapthlak taka sawisatu a ni miau a. Zu hian Kristian nun nasa takin a tichhia a, mi tam tak nunna a suat tawh. Chuvangin ringtute hmelma a ni. Ziaktu pakhat chuan, "Zu zawrh hi khawvela hna chhe ber a ni a, thlanmual a tizau a, hremhmun a titawt thung", a ti.

b). Zu ruih:

Bible chuan zu ruih hmangte chuan Pathian ram an lut lo vang ( IKor. 6 : 10 ) a ti tawp mai a ni. Chu bakah chung pik thin te, lungngai ngawih ngawih te, inhau thin te, thubuai nei thin te, hliam tuar thin te, chutiangho chu zu rui thinte hi an ni, tiin Solomona chuan minhrilh a ni ( Thuf. 20 : 1 ). Min tichapo a, tawng chaltlai min chhak chhuahtir thin ( Thuf. 23 : 31 ).

c) Zu in:

Zu ruih chu sawi loh, a ina in hrim hirm pawh hi Pathianin a duh lo a, a khap tlat a ni tih hi i hria ang u. Thufing 31 : 4-ah chuan, " Lalin uaiin a in tur a ni lo va, rorel turin khawnge rakzu a ti tur a ni hek lo" a ti a. A in a in chu sawi loh, a in thinte kawm pawh Bible chuan a phal lo a ni. "Uaiin heh mite zingah leh sa heh mite zingah tel suh. Zu heh mi leh sa heh mite chu an la rethei dawn si a", ( Thuf. 23 : 20 ). Zu in thei riau ( heh riau ) te, dawidim telh reng reng in thin te , zu um a, zu in thin zawng zawngte hmabak chu chungpik ngawih ngawihna a ni ( Isaia 5 : 22, 11; Exo. 12 : 20 ). Chutichuan, zu zawrh te, zu in te, zu ruih hmangte zawng zawng chu Pathian hmelma an lo ni reng mai a, nakinah phei chuan, Lalpa thin urna engmah pawlh loh chu an in ang a, vanrihkohte hmaah leh Beram No ( Lal Isua ) hmaah mei leh kata nghaisakin an la awm dawn a ni ( Thup. 14 : 10 ).

d). Tih loh tur thenkhat te:

Ringtute kan lo nih tawh chuan Pathian duhzawng leh duh loh zawngte hi ngaihtuahin kan nung thin tur a ni.Pathian tenzawng tlem tar chhuak ila; Bukna dik lo hman te, tehkhawng dik lo hman te, dawi thiamna lam thil te, nawhchi zawrh te, leh sawma pakhat pek duh loh tlatte pawh hi Pathian rilru tinatu leh, kan malsawm dawnna hnar tichattu a ni fo thin a ni ( Mala. 3 : 8, Deut. 25 : 13 - 16, 22 : 5, 23 : 18 ).