Leitung ah minthanna kideih ciatin lampi tuamtuam tawh kizong ciat hi. Tua bang minthannate i et ciangin a hoih le ahoih lo namnih om tawn tung hi. Na hoih semte asih khit nangawn in manpha mahmah a, na hoihlo semte khasiat huai takin nuntakna nangawn mahial om hi. Leitung tangthu sungah kiciamteh miminthang tampite' sung pan anuntakna uh mulkim huai tak mahial ahi pawl khat Adolf Hitler, Khmer Rouge makai Pol Pot, Saddam Hussien, Osama Bin Laden cihte ahi hi. Hih mite in leitung ah mihing tampi a thatmai mi minthangte hi uh a, a sih ciangin zong kua mahin lainatpih lo banah mulkim huai takin Uipi si bangin kibawl uh hi.
Hih mite nuntakna i et kikkik ciangin a nungta Pasian thei kha lo mite ahi uh hi. Hun khat sung a gualzawh hangun, hunkhat ciangin guallel le mulkim huai takin leitung nusia uh hi. Galati LST 6:6-7, sungah " I vawh bangin ki-at ding " cih pen Pasian thukhun lianpi khat ahi hi. Kumpi tokhom tungah nuamsa tak a tut hun om bangun, kumpi inn sung pan kikaikhia in maizum huai le mulkim huai takin athuak kik vive te ahi hi. Topa Jesu akimat ding laitak in Peter in a namsau tawh galkap khat abil satkhiat sak Jesu in amuh ciangin , " Namsau a paii ah siat in, Namsau tawite namsau mah tawh si ding hi" ci hi. Tua banah Jesu in, "Nang tung hong bawl ding na deih bangin midangte tungah bawl in! "( Matt.7:12) a cih pen thuman thudik ahi hi.
Abeisa September 11, 2001 ni-in Osama Bin Laden makaihna tawh khualzin mi tuanna Vanlang 2 tawh World Trade Center (USA) kipukham in vut le vaii suak hi. Vanleng tung a tuangte le WTC sungah a zi-le-tate, sungkuante adia nek le dawn zong nasem mipi 3,000 valin mulkim huai takin sihna tuak uh hi. Hih bang a mi tampi sihna hangin leitungbup Islamic te lungdam mahmah uh hi. Tua ni akipan US President lui George W.Bush Jr in hiamgam langpanna ‘War Against Terror’ hong pankhia in, a galkap thahat pente le galvan hoih penpen teng pholhkhia in, Afghanistan gamah Osama Bin Laden kibu ding cih upmawhna tawh Afghanistan’ Tora Bora mualkuam teng US galvanlengte tawh buluh uh hi. Afghanistan gam sung kum tampi a zon khit ciangin mukhia zo mahmah lo uh a, a mau upmawh lohna mun Pakistan gam Islamabad khuapi pan Km.60 gamlatna, Pakistan Military Academy omna Abbotabad khuapi a Osama Bin Laden bukna inn sung ah May 1,2011 ni-in US Commando te’n buluh in kaplum ziau uh a, a luanghawm na ngawn mulkim huai takin Tuipi sungah khia uh hi. Bin Laden kithatna hangin US gambup ah lungdam in awng ziahziah uh hi.
Pasian in tanglai pek akipan gitlohna deih het lo ahih manin , a hunhun in gitlohna bawlte hemkhia zel hi. A pha ahi a, a sia i sepkhiat khempeuh Pasian maiah kiselsim thei loin hunkhat ciangin kipholhkhia veve hi. Leitungah mihau, mipil, mi thahat le mi gualzote atawntung kimang suak cih bang om ngei lo hi. Thuhilhsia LST sungah, " Na khempeuh in hun nei " a cih pen a man mahmah ahi hi. Osama Bin Laden pen mihau le nungzui tampi a neih hangin, aminthanna le athahatna te US Commando tawmno khatin minutes 40 sungin nuai mang ziau uh hi. Tua hi in leitungah thuman lo tawh mihing tampi a thahsawm Mr. Adolf Hitler, Pol Pot, Saddam Hussien, Osama Bin Laden cihte pen etlawm het loin nuntakna hial uh a, kua mahmah in khitui luan kha lo uh hi. A hi zongin Pasian leh mihing lungkimna bang a nasem siam le minthangte a sih ciangun leitungbupin khitui kiluanpih thei lai hi. Tua bek tham loin, a sihni nangawn uh ni thupi khatin kiciaptehsak lai hi. Tua banga mai zum huai tak a site pen ata atute khangah zong leitungah maizum in om den ding hi lai zen hi.
Leitung ah dam sungin na hoih asemte asih khit ciangin a min uh a hoih lamin kiphawkphawk lai hi. Tuni a nasem hoih hangin, na beh na phung, khua le tui, minam le Pasian ading a thupi ding kisam lua hi. Nang nasep hoih le hoih lo hangin na ta na tute akipan na minam in hong angtangpih ding nasep sep huai hi. Hih leitungah i om nawn loh ciangin khangsawnte ading maizumna sangin, maipha ngana le lungkimna dingin tuni nasep na bawlnate a hoih vive bawl sawm ni. I gamtatna bangbang tawh kituak in vantung bek hi loin, hih leitung i nuntak sung mahmah ah kingah/ ki at pahpah hun ahi hi. Midangte phattuamna a piangsak nuntakna pen a man nei nuntakna ahi hi. Tuni i sepna i bawlna le i gamtat kampaunate khempeuh zingciang le mai lam ading i Tangthu a gelhgelh i hi hi.
By: Tongsan Pu
No comments:
Post a Comment