Pu Cin Sian Thang leh Jesu

I minam sungah minam a dingin a sem ahi Pu Cin Sian Thang thu tawm khat ka muh bangin kong thei sak nuam hi. A nuntak zia zong Jesu Khris tawh tehkak theih ding om hi.

Jesu Khris pen van panin a vangliatnate nusia in leitungah hong pai suk a mihing khat mah bangin inn leh lo kician zong nei loin hong vak belbel hi. A mite tung panin lamsap diing, khualzinna dingin a kisam sum leh paai dong sak ngei lo hi.. A hihna leh a neihna tawh kituak gam ta hi. Siah piak ding na ngawn a neih loh hun zong om hi. Tua bangpi tawh a mipihte haksatna ahih thei bangbangin huh ciauciau kawikawi in, ahih hangin ana deih het lo a pil, a hau leh biakna lamah cilgil a kisa pawl khatte vaihawm siamna tawh singlamteh tungah khailum uh hi. Tua itna in a hun lai-in a kisan theih loh hangin leitungah tu hun ciangin mihing khempeuh lakah nugnzui hau pen hong suak hi. Tua Jesu Khria nuntakna pen politiciante leh Missioanry minthangte in Model in la uh hi. Tua pen Sawltak Paul in, “Tua bang lungsimna nei un,” in Khristian masate na hanthawn hi.

1990 kumin Kawlgam bup kiteelna a om ding ciangin minam a it pawl khat in, “Zomi National Congress,” ci-in kumpi registration na bawl uh hi. 1990 kum kiteel ma-in party kitelma-in party ciatin a tupna ciat uh Kawlgam Redio pan leh TV panin thugen ciat ding cih hong om ciangin Pu Cin Sian Thang in a gen ding khempeuh a bawl khit hangin a sum bei ding bagn mah nei lo hi. Tua pen Pu Dai Cin (Pa Len Cin Thang@Thangno pa) in, “Bang zah kisam ding hiam?,” a cih ciangin, “Ks. 6000/- (Tulguk lian) kisam hi,” kici hi. Tua ciangin Pu Dai Cin in, “Kei man si ning ei,” a cih ciangin redio pan leh TV panin thugenna nei thei hi. Tua hun lai-in Kawlpi pan Mandalay vanleeng sap Ks. 185/- hi a, Kawlpi pan Zangkong Ks. 228/- ahi hi.

Tua kiteelna-ah Pu Thang Lian Pau leh Pu Cin Sian Thang in Member of Parliament ngah uh hi. Kumpi in tua kiteelna pen a thusim loh uh ciangin teel cing khempeuh in ma ban zom thei loin, Zomi sung panin MP a ngah nihte khat gampua ah khat gam sungah minam adingin luangkhamin pan la uh hi. Tua nihte pen tu lai takin minam vai tawh kisai-in Zomite maitang hong suak hi.

Hi bangin kumpi lam panin haksatna hong om ciangin Pu Cin Sian Thang pen minma vai tawh 10vei (Sawmvei lian) dong thongkiatna thuak pah hi. Kumpite in, “Khawl lel in na nuntak theihna dingin inn leh a kisam bangbang kogn vaihawm sak ding uh hi,” ci-in tamveipi a zol hangin na sang loin minam vai tawh bang mah nei lopi-in Zangkong khuapi sungah om hi.

A neu tung pan kipan in Khristian khat leh pawlpi makai zong a sem ngei ahih hangin Zangkong khua sung biakinnte ah a dak khak bek nangawn ui ekpu bangin ki-en ahih manin kikhopna ding leh thungetna ding mun zong a nei lo suak a, a hawhna aciahna peuhah kua mah lawm ding pawl ding zong a nei lo hong suak hi. Tua kawm kalah Pu Dai Cin pawlpi ahi Zangkong EBC in pawlpi member in sangin tua pan kipan in biakinn sung panin Pasian tawh kizopna hong nei kik suak hi.

A tate zat taak ding a om nai loh tawh sum leh pai zong a ip sungah om ngei loin Zangkong khuapi sung ah vak deemdeem a, mi khat peuh phone tawh hopih leh zong amah cih a theih uh ciangin bagn mah gen mah loin, ‘Ko zong sum kisapna tamin tu lai tak hong huh zo kei nung,” cih tawh kidawng den hi.

Tua kawmkalah a tapa khat phungzite vai (2007) kumin 88 sangnaupangte tawh pan la khawm ahih manin kiman in tu dong thong sungah om lai hi. A nu a sih lai takin zong a kihopih ciangin Kawlpau bek zang sak uh hi.

Zangkong Agape pawlpite in nipi ni khat thugen dingin sam a, Pasian gupkhiatna thu leh kha nuntakna a kisapna thu bek gen ahih manin lamdang kisa mahmah hi. Pasian thug lunngulhin thugnet sakna bang deih den hi.

Gamdang panin hong ciah ahih keh hong hawh pakte na ngawnin mu ngam lo bek hi loin kuamahin zong phone tawh ahi zong a hopih om mel lo hi. Tua kawmkalah kawlgam sugn politic tawh kisai gamdang panin VIP hong pai khempeuh tawh kimuh pihin, kawlgam sung politics tawh kisai a muhnate leh mailam a ngimnate dong den uh hi. Kawl gam sungah a om gamdang embassy nasem khempeuh in zahtak bawlin vai khat peuh a neih uh ciangin sam den uh a, Israel ambassadors in zong zahtak piakna tawh Israel gam panin a piang leenggahzu puak thei keuhkeuh hi.

Tua bangin zangkongah a om hangin inn zong nei loin, minam a it pawlkhat tung panin a ngah tawh sum tawh innsap hi. Gamdang VIP-te mu ding leh gam sungah vai thupi a om ciangin taxi sap ding na ngawn nei loin, loin line Bus vive tawh pai-in, a lawmte ahih leh mawtaw hoih nono tawh pai uh hi. A kamphat ni-in a lawmte in inn dong mawtaw tawh kha thei uh hi.

Neihsa om het loin a kia tawm tawh minam adingin a cihtakna hangin meikhua paisuak hun zong tamvei mah nei hi. Meh nei loin buh leh ci bek tawh zangkong khuapi sungah nek hun zong nei thei zel hi.

Tu tung a zi hong nusiatna zong sum leh paai kicing hi leh zato hoih khatah kilak leh hong hici biangbuang lo ding hi. A angkawi in a gim pian ciangin sitnipa phong a, “Na angah hong kawi-in,” ci-in tua zawh a sawt loin a it mahmah a zi pen a angah a hu nunung pen sang ahih manin angtang mahmah hi. A zi luanghawm vuina ah politics minthang khempeuh in va gal a. Daw Aungsan Suh Kyi zong a inn teek va pha in dahpihna paakkual va pia hi.

Minthanna sangin minam a veina lian zaw ahih manin a thuak khempeuh zong lungkim tak leh lungdam takin thauksiamna Pasian in guan hi.

Sia Khen
Kawlpi